غسيل الاموال | me4 fahem - مش فاهم

Breaking

Post Top Ad

Post Top Ad

الاثنين، 11 مايو 2020

غسيل الاموال | me4 fahem

غسيل الاموال | تعريفه واضراره على اقتصاديات الدول

لو انت تاجر مخدرات او مهرب سلاح او عندك شبكة دعارة دولية  وارباحك كاش بالملايينلو انت موظف حكومى بيتقاضى رشاوى ضخمة بالعملات الاجنبية والمحلية او لو جاسوس او بلطجى بتبتز الناس فانت بالتأكيد معاك فلوس بالهبل بس اول ما تبتدى تعمل اللى انت عايزه ممكن تلفت النظر ليك وتلاقى جهة رسمية تسألك الفلوس دى جت منين؟!

ماينفعش تبقا كسبان 20 مليون جنيه من صفقة مخدرات او من تجارة اعضاء وتروح تحطهم فى البنك، البنوك بتسأل عن مصادر الفلوس وبتاخد منك بيانات والبيانات دى بتحطك قدام الاجهزة الرقابية والامنية ودول مش هتعدى عليهم مبالغ كبيرة خصوصا انها مبالغ بتدخل السيستم الرسمى يبقا ايه الحل غير غسيل الاموال ؟!

غسيل الاموال | me4 fahem

ايه هو غسيل الأموال؟ 

معناه ان الفلوس اللى جاية من مصادر غير مشروعة تدخل فى القنوات الشرعية بعد سلسة من الاجراءات اللى تحولها لفلوس مشروعة وبالتالى تبقا اتغسلت اه بتبقى قلت شوية بس مش مهم المهم ان اتكبلها شهادة ميلاد. 

فلوس المخدرات كانت بتتغسل فعلا لأنها فلوس عدت من ايدين مدمنين لايدين ديلرز واتلوثت بالمخدرات وفى الاخر كانت بتبقا ريحتها مخدرات فايحة وعشان ماتتفضحش كانت بتترش بمطهرات وتتعقم وتتبخر وتتكوى وتترص فى رزم.

بابلو اسكوبار

اشهر تاجر مخدرات فى التاريخ كان بيكسب حوالى مليون دولار كل خمس دقايق من تجارة الكوكايين وكان مغطى نشاطاته فى كولومبيا بشركة تاكسيات مشروعة ومعلنة مكونة من 3 تاكسيات بس كولومبيا فى التمانينيات كانت سهلة فى موضوع الرقابة عشان كدا اسكوبار مكانش عنده مشكلة.

نماذج حية لغسيل الاموال

ممكن تشغل فلوسك فى حاجة مشروعة .. ومن خلال عمليات محاسبية جوة اعمالك المشروعة تسرسب مبالغ من اموالك غير المشروعة على انها ارباح جيالك من اعمال مشروعة .. تفتح مطعم وتبيع الفرخة فيه بـ100ج بس الفواتير اللى بتدخلها حساباتك هتقول ان مطعمك بيبيع الفرخة بـ 300 ج وبكدا يبقا كل فرخة بتبيعها بتدخلك 200 ج مكانش ليهم وجود لحساباتك الشرعية اللى هتروح البنوك على انها من ارباح المطعم .. وممكن ماتفتحش مطعم ولا تعمل اللفة دى كلها ممكن بمنتهى البساطة تروح لحد صاحب مطعم وتديله فلوسك غير المشروعة يدخلها فى فراخه ويطلعلك فلوسك المشروعة على اساس انك شريك فى المطعم مقابل انه ياخد نسبة من الفلوس ودا اسهل طبعا من انك تعمل المطعم بنفسك وتقعد تتبل وتحمر.

وممكن تعمل زى ما ناس كتير فى مصر بيعملوا .. تفتح محل انتيكات وتشترى شوية تحف قديمة على اساس انك بتتاجر فيهم وبعدين تبيع الحاجات التعبانة دى بمبالغ ضخمة انت بتشتريها على انها روبابيكيا والروبابيكيا ملهاش فواتير وتبيعها فى الغالب فى عمليات بيع وهمية بفواتير بفلوس كتير جدا هى اموالك القذرة بعد ما دخلت السيستم بسلامعشان كدا هتلاقى محلات ملابس وانتيكات فى ارقى الاماكن وعمرك ماهتشوف فيها زبون واحد ومع ذلك عمرها مابتفلس ولا بتقفل  .. دى بتبقا واجهات لغسيل الاموال.

ايه الضرر لغسيل الاموال ؟ 

اقتصاديات الدول هتتاثر ازاى ؟ 

اولا فى فلوس بتطلع من البلد بالتأكيد وغالبا بتطلع بعملات اجنبية.
ثانيا ان النظام المالى للدولة هتبقا فيه كمية فلوس اكبر من حجم الاعمال المشروعة جوة الدولة ودا يعنى تضخم.
ثالثا ان غسيل الاموال اصلا معناه ان عندك مجرمين فى البلد وممكن بسهولة يستخدموها فى تمويل انشطة اجرامية جوة البلد.
رابعا ان الاستثمارات الاجنبية مابتدخلش بلد فيها معدلات غسيل اموال كبيرة.

دى كانت لمحة نسيطة عن غسيل الاموال وطريقة عمله وعمايله .. لو عندك اى اراء تانية  او اى مشاركات او مناقشات او اى مواضيع حابب نتكلم عنها الكومنتس موجودة ..

ليست هناك تعليقات:

إرسال تعليق

Post Top Ad